إعداد السيرة الذاتية - CVs

السي ڤي: تكتبه إزاي وتعرضه لمين؟

كتير من الناس بتسأل: أكتب إيه؟ أبدأ بإيه؟ أسيب إيه؟
والإجابة دايمًا بتبدأ من سؤال بسيط: أنت بتقدم لمين؟

1 - الهدف منه:

السي ڤي مش مجرد ورقة، ده عرض بيع.
يعني لازم تبين اللي عندك بشكل يخدم الوظيفة اللي بتقدم عليها.
لو بتقدم على Embedded Software، يبقى لازم انه يعكس إنك اشتغلت على مايكروكنترولرز، بروتوكولات، لغات برمجة زي C، وأنظمة تشغيل زي RTOS.

 

2 - شكله وتنظيمه

• لازم يكون منظم، شكله نظيف، والفونت موحد.

• السكاشن تكون واضحة: Education، Experience، Projects، Skills، إلخ.

• مايبقاش فيه ألوان كتير أو صور، خصوصًا لو بتقدم على شركات تقنية أو مالتيناشونال.

   

3 - التعليم (Education)

• اكتب الكلية، التخصص، وسنة التخرج بوضوح.

• ما تخبيش سنة التخرج، لأن ده ممكن يدي انطباع إنك بتحاول تخدعهم.

• لو عندك شهادات إضافية أو دبلومات، اعرضها، خصوصًا لو ليها علاقة مباشرة بالشغل.

   

4 - الخبرة العملية (Experience)

• الخبرة معناها إنك اشتغلت فعلًا، سواء شغل دائم أو تدريب.

• فرّق بين الشغل الحقيقي والكورسات.

• لو اشتغلت في شركة أو مشروع حقيقي، اعرضه بوضوح، حتى لو كان تطوعي أو مؤقت.

   

5 - المهارات التقنية (Technical Skills)

• اكتب اللغات اللي اشتغلت بيها (C, C++, Python… إلخ).

• اعرض البروتوكولات، الأنظمة، الأدوات، والسنسورز اللي اشتغلت عليها.

• ما تستقلش بأي مشروع، حتى لو بسيط. المهم إنك اشتغلت فعلًا واتعلمت حاجة.

   

6 - المشاريع (Projects)

• اعرض المشاريع اللي اشتغلت عليها، ووضح دورك فيها.

• اكتب اسم المشروع، الأدوات المستخدمة، والهدف منه.

• لو المشروع كان جزء من كورس أو دبلومة، وضّح ده.

   

7 - الحالة العسكرية (Military Status)

• مهم جدًا توضح وضعك في التجنيد وانت بتقدم من مصر خصوصًا لأول شغل.

• لو معفى وضّح.

• لو خلصت الجيش، اكتب تاريخ الدخول والخروج.

• ما تسيبش الموضوع غامض، لأن ده ممكن يخليهم يرفضوا الCV من البداية.

• لو اشتغلت فى الجيش فى نفس تخصصك وضح ده لانه بيديك شوية خبرة قدامهم.

   

8 - التايم لاين (Timeline)

• وضّح تسلسل حياتك المهنية والتعليمية.

• لو فيه فجوة بعد التخرج، وضّح السبب (جيش، دراسة، تدريب… إلخ).

• ده بيساعدهم يفهموا إنك ماكنتش قاعد في البيت نايم.

   

9 -  المهارات الشخصية (Personal Skills)

• ما تكتبش كلام إنشائي زي "أنا ملتزم وباجي بدري".

• اعرض المهارات من خلال أفعال: شغل تطوعي، قيادة فرق، تنظيم فعاليات… إلخ.

• ده بيبين شخصيتك بشكل عملي.

   

10 - اللغات (Languages)

• اكتب اللغات اللي بتعرفها، ومستواك فيها.

• لو معاك شهادة زي TOEFL أو IELTS، اعرضها.

• لو مش معاك، وضّح مستواك بشكل واقعي (مثلاً: Good, Very Good, Fluent).

توضيح أكتر وكمان مراجعة CVs مختلة فى الفيديو ده:

Youtube: CVs and Interviews